كم عدد الطوب فى المتر المربع و المكعب؟

كيف تستخرج تصريح سفر و عندك استدعاء من الجيش؟ 

تصريح سفر

بسم الله الرحمن الرحيم 

كتب مهندس / محمود كامل .

فى البداية 

قبل البدء يجب أنوه على أن هذه الصورة تتضمن كل وسائل التواصل بادارة التجنيد المركزية ( اتصل واسأل عن أي شيء ). 

عايز اتكلم عن موضوع ما هو تصريح السفر ؟

 بص يا سيدى ، تصريح السفر ده فايدته انه فى سن التجنيد سواء كنت أديت الخدمة العسكرية أم لا ، حتى لو كنت أخذت تأجيل ، و مش هتقدر تخرج من مصر من غيره ، سواء مسافر علشان عمل أو رحلة أو حتى زيارة ، نخلى بالنا هنا أنا لا أقصد الطلاب بموضوع تصريح السفر ، لكن الطلاب المسافرون و سنهم قابل للتجنيد يروحوا يجيبوا اذن سفر و ليس تصريح سفر 
هناك فرق بين الاذن و التصريح 
الاذن للى مش دخل جيش لكن عليه جيش زى التأجيل 
التصريح للى دخل الجيس و على قوة الاحتياط .

الشبان المستحقين للإذن بالسفر للخارج من إدارة التجنيد والتعبئة أو مناطق التجنيد والتعبئة

• المؤجل تجنيدهم للدراسة بالخارج.
• المستثنون مؤقتاً من أداء الخدمة العسكرية.
• الحاصلون على إعفاء مؤقت.
• الموضوعين تحت الطلب لمدة ثلاث سنوات.
• الذين أدوا الخدمة العسكرية ولم تنته مدة خدمتهم بالإحتياط.
• الطلبة الدارسين داخل أرض الوطن والمؤجل تجنيدهم أثناء أجازة نصف العام ونهاية العام عدا طلبة السنوات النهائية وطبقاً للتعليمات

تعالى معايا نبدأ خطوة خطوة 

الخطوة الأولى : هتدخل موقع التجنيد الخاص بوزارة الدفاع المصرية علشان تعرف موقفك من موضوع استخراج التصريح و لا لا ، موقع التجنيد  ⇐   هنـــــــــــــا
هتدخل الموقع ده ، و بعدين تملأ البيانات التى يطلبها منك كما هو موضح بالاسفل ، خلى بالك لو أديت الخدمة أختار أدي الخدمة و هكذا يعنى ،

الخطوة الثانية :  بعد الدخول و التسجيل هتستنى ٢٤ ساعة
 و  تدخل اللينك ده  ⇐ اضغط هنا
 تشوف موقفك و قالك ايه الموقع ، زى الصورة اللى تحت دى .

لنفترض قالك  لا مانع من استخراج تصريح السفر  ، انت فى هذه الحالة خلاص روح مكتب التجنيد التابع ليه او مديرتك التابع ليها او لو كنت فى القاهرة استخرجه من حلمية الزيتون أو الهايكستب و هكذا و استخرجه فى الحال ، وممكن تستخرجه عبر الموقع نفسة بتاع التجنيد بعد سداد الرسوم ادخل   هنا 
وفى مكاتب سيبر نت فى مدينتك هتلاقى ناس بطلع لك التصريح وانت وواقف
ومن جهه الاختام اللى بتكون فى التصريح ، متقلقش بيتم طبع الورقة اقصد التصؤيح بأختامه دى عبارة حاجة اسمها ديباجه للتصريح .

و فى هذه الحالة  الموضوع ده لا يعنى لك شى 

اما اذا قالك : (  لا مانع من استخراج تصريح بالاذن للسفر بعد تقديم المستندات التالية )

المستندات التى يجب احضارها :

• عليك التوجه لمكتب التجنيد و التعبئة التابع له و ذلك لانهاء موقف تخلف الاستدعاء 

زى الصورة اللى تحت دى 

لو ظهرت دى يبقى تعالى هنا (  السؤال هنا : انت اكيد مروحتش علشان لما جالك الاستدعاء كنت خارج البلاد ؟ )

لو كانت اجابتك لا 

فأحب أقولك انت مكانك مش المقال ده 

اما لو كانت نعم 

فاحب اقولك كمل المقال للاخر 

أولا : هتروح العباسية مقر الجوازات و الهجرة مع العلم انه كان فى التحرير و نقلوه العباسية و ندخل الدور الاول و نروح على مكتب التذاكر بالدور و تقوله عايز اطلع ورقة بيان تحركات هيديك ورقة تملاها و رقم تستنى بيه دورك 

طبعا تملأ الورقة و بعدين تصور الجواز صورة و البطاقة كمان صورة 

يبقى معاك 3 ورقات ، لما يجى دورك تقدمهم للموظف اللى فى الشباك هيديك وصل لتدفع بيه فى بنك مصر جمبك على فكرة مش بعيد فى نفس الدور 

هتدفع الفلوس و يديك ايصال دفع و يقولك تعالى يوم كذا و غالبا بتطلع تانى يوم 

المهم روحت تانى يوم و استلمتها 

أخر تحديث : لا داعي لذهابك للعباسية بالقاهرة يوجد فى كل محافظة مكان تستخرج منه شهادة التحركات و هذا المكان اسمه مديرية المحافظة او مكان الجوازات صور الجواز و البطاقة كمان .

اصبح التحديث الاون لاين بالنسبة لخدمات القوات المسلحة أسهل و أسهل .

ثانيا : تروح مكتب التجنيد التابع ليه ، لنفترض انك من سوهاج تروح مكتب تجنيد سوهاج العسكرى اللى هناك هيقولك روح المديرية و هات رقم و تاريخ الاستدعاء 

هتروح المدرية هيديك رقم و تاريخ الاستدعاء زى  كده 

ثالثا : تروح لمكتب التجنيد و تروح للعسكرى اللى هناك هيقولك صورلى ورقة التحركات و الجواز و البطاقة و ياخد رقم و تاريخ الاستدعاء 
و يقولك تعالى كمان 3 ايام 
و على فكرة الموضوع ده مش ياخد من العسكرى 3 دقايق مش 3 ايام 

رابعا : المفروض يكون حضر ليك الورق و هى عبارة عن 3 ورقات 
الاولى عبارة عن محضر فيه سؤال و جواب هيكتبها العسكرى مع نفسة 
التانية فيها امضاء ولى الامر و ممكن تمضى انت بداله بس تجيب صورة بطاقته
التالتة خاصة بشيخ البلد يوقع و يمضى عليها انك كنت مسافر وقت الاستدعاء 
المهم بعد ما تاخد التلات ورقات و يمضى عليهم شيخ البلد و يديك صورة بطاقته و ولى الامر ( ممكن يبقى ابوك ، اخوك ، ... )
يديك صورة بطافته هو كمان 


خامسا : تاخد ال 3 ورقات + 2 صورة البطاقة لولى الامر و شيخ البلد تروح على العسكرى بتاع التجنيد اللى فى المركز 
هيقولك روح وقعهم من مدير المركز قبل ما توقعهم من مأمور المركز فوق ( الدور التانى - مركز سوهاج )
هتروح تمضيهم من المأمور هيقولولك وقعهم من الاستاذ حمدى فى نفس الدور برضو 
المهم وقعتهم من مأمور المركز

سادسا : انزل للعسكرى تانى اديلوا الورق هيقولك صورهم صوره ، هو هياخد الاصل و يقولك روح اختمهم من المدرية اللى فى سوهاج فى حته اسمها المحافظة .
تروح تختمهم من هناك ورقة ورقة و بعدها تانى يوم تروح مكتب التجنيد بأسيوط .

سابعا : تصحى بدى تروح اسيوط تكون فى اسيوط على الساعة 8 او 9 الصبح ( ان شاء الله ) 
تروح التجنيد فى مكان تصاريح السفر و بعد ما تدخل هناك هيقولك سلم تليفونك بصورة بطافتك و اشترى ملف ب 3 جنية و صورة بطاقتك 
هتروح شباك ( فرع التعبئة ) على ايدك اليمين و انت  و داخل التجنيد المهم هيقولك هات الورق بتاعك علشان الشطب 
هياخد الورق اللى خلصتوا فى سوهاج و المختوم  + شهادة التجركات + صورة شهادة الجيش + صورة البطافة بتاعتك 
هيقولك استنى للساعة 12 او 1 الظهر 
و بعد ما يخلص و يشطب تخلف الاستدعاء من الكمبيوتر هيديك ورقة الاصل منها للمركز بتاع سوهاج ، و الصورة تحتفظ بيها ليك للاحتياط 

شطب استدعاء فرد احتياط

بالورقة دى انت كده شطبت الاستدعاء و بعدها روح طلع تصريح السفر عادى من سوهاج او اسيوط او حتى الحلمية 
لكن لو عايز تطلعها فى نفس اليوم من اسيوط خد من العسكرى اللى فى سوهاج بتاع المركز حاجة اسمها طلب ايضاح + 14 جند ( تقريبا اسمها كده )

أو 
ممكن تروح حلمية الزيتون كمنطقة مركزية و تروح تدخل و تطلع تصريح السفر فى نفس اليوم و تدفع 60 جنية رسوم 
هيكون شكلها كده 

ملحوظة : الشطب من خلال اجهزة كمبيوتر القوات المسلحة بيتم شطبه اتوماتيكى من سجلات الموقع الالكترونى خلال 48 بعد تقديم طلب الشطب يعنى انتظر يومين منهم اليوم اللى روحت فيه و قدمت طلبك للتجنيد و اليوم ده محسوب يبقى فاضلك يوم كمان وبعدين اليوم اللى بعده طلع التصريح عادى .

تصريح سفر

مع العلم أن مدة صلاحية التصريح 15 يوماً فقط 

يعنى استخرجه قبل سفرك بأسبوع -ان شاء الله - لما تحجز و تظبط أمور حجزك و تعرف قدامك 7 أو 10 أيام مثلاً روح استخرج التصريح .



كدة مبرووووك عليك .

آخر تحديث : 
حالياً يوجد استدعاء للدفعات التى مر على خروجها من الجيش عام و يأتى هذا الاستدعاء خلال الشهرين ( 10 ، 11 ) و الأكيد يأتى فى أواخر شهر 10 ثم يتم قضاء الاستدعاء فى شهر 11

حالياً يوجد استدعاء مدته 15 يوم من تاريخ 02 / 11 / 2019 وحتى 16 / 11 / 2019 

للوافدين المستخرجين جديد من الجيش خلى بالك بيبقى فى استدعاءات بعد عام واحد من خروجك من الجيش .