تعرف على كيفية استبدال أقطار حديد التسليح
على بركة الله
بقلم مهندس /محمود كامل
تعالى اليوم أقولك حاجة مهمة هتقابلك فى الموقع و انت كمهندس مدني لابد من معرفتها و هى
ازاى تستبدل أقطار حديد التسليح فى الموقع
بمعنى عندك ٦ أسياخ قطر ١٤ و الحديد اللى موجود فى الموقع قطر ١٨، قولى يلا هتعمل إيه؟😂
تعالى نشوف الطريقة كده مع بعض
الصراحة أنا كذبت عليك لما قولتلك طريقة لأن هناك طريقتين للعملية دى 🤔
أولاً استبدال أقطار حديد التسليح بواسطة مساحة السيخ.
بفرض أن حديد ١٤ هنسميه مساحة رقم ١ (م١)،وعددها (ن١) ،ومساحة حديد ١٨ هنسميه (م٢) ،و عددها (ن٢).
اذن امشى معايا كالآتي
ن١ × م١ =ن٢×م٢
٦ × (( ٣.١٤×١٤×١٤)÷٤) = ن٢ × ((٣٠١٤×١٨×١٨)÷٤)
توهت منى صح؟ 😂
الصورة دى هتوضحلك حصل إيه 👇
مكان ٪ هو اللى اقصد بيه (ن٢)
اذن
ن٢ =(ن١×م١) ÷م٢ =٩٢٣.٦٣ ÷٢٥٤.٤٧=٣.٦٣
يعنى بالتقريب للأعلى يساوي ٤ أسياخ قطر ١٨ بدلاً من ٦ أسياخ قطر ١٤.
الطريقة الثانية بواسطة وزن المتر الطولى للسيخ :
بفرض وظن المتر الطولى (م. ط)
اذن
ن١ × م. ط١ = ن٢ ×م. ط٢
و عايز تعرف أى وزن متر طولى لأى سيخ استخدم المعادلة دى
مربع القطر بالمللميتر مقسوماً على ١٦٢
و هذه المعادلة لأى سيخ تسليح، تمام؟
تعالى نجيب م. ط١ 👇
تعالى نجيب م. ط٢ 👇
دلوقت تعالى نطبق المعادلة بتاعت ايجاد استبدال أقطار حديد التسليح بواسطة طريقة وزن المتر الطولى.
ن١ × م. ط١ = ن٢ ×م. ط٢
اذن
ن٢ = ( ن١ × م.ط١) ÷ م.ط٢
ن٢ =(٦ × ١.٢١) ÷ ٢
ن٢ = ٣.٦٣ يعنى بالتقريب للأعلى يساوي ٤
يعنى برضو طلعت نفس النتيجة السابقة و لازم تطلع نفس النتيجة علشان دول طريقتين زى بعض
لكن انت اختار اللى يريحك.