اشتراطات حديد كانات الأعمدة المسلحة

على بركة الله

بقلم مهندس / محمود كامل.

تعالوا اليوم نتكلم عن :

اشتراطات حديد كانات الأعمدة المسلحة المقاومة للزلازل.

المسافات بين الكانات هي القيمة الأقل من ال4 اختيارات الأتي : (ركز بقول تاخد القيمة الأقل منهم).

1. 8 مرات (ثمانية مرة) قطر أصغر سيخ تسليح بالعمود.

2. 24 مرة (أربعة و عشرون مرة) قطر كانة العمود.

3. نصف أصغر بُعد للعمود.

4. 150 مم يساوى 15 سم.

تعالى بقى نعرف مسافة تكثيف العمود قد إيه؟

مسافة تكثيف العمود ( خد الرقم أو القيمة الأكبر من ال 3 مسافات اللى جايين، ركز تاني خد المسافة الأكبر).

1. (1÷6) × الارتفاع الخالص للعمود.

2. البُعد الأكبر للعمود.

3. 500 مم تساوى 50 سم.

هتيجي هنا و تقولي أنا مش فاهم حته البُعد الأصغر و البُعد الأكبر للعمود... هقولك مش العمود ده فيه طول و عرض... صح ؟

طيب ما البُعد الأكبر هو الطول و الأصغر هو العرض.

طيب لو العمود طول زي عرضه (مربع) ... يبقى الاتنين واحد.

ملاحظات في تسليح كانات الأعمدة المسلحة

👈 يتم وضع أول كانة على مسافة لا تزيد عن

( نصف ال S), حيت الS دى هى المسافة بين الكانات.

👈 تستمر كانات العمود داخل الكمرة (مثل الصورة) بنفس مسافة التقسيط بين الكانات.

👈 يتم السماح بعمل وصلات التراكب عند منتصف ارتفاع العمود.