 |
| متى يتم عمل حديد القواعد حرف L أو حرف U ؟ |
على بركة الله
بقلم مهندس / محمود كامل.
موضوعنا اليوم عن سؤال قد يتكرر فى ذهنك دائما كمهندس مدني أو معماري.
و هو :
متى يتم عمل حديد القواعد على شكل حرف L ؟
و متى يتم عمل حديد القواعد على شكل حرف U ؟
أولاً : يتم عمل حديد القواعد على شكل حرف L
عندما تكون الرفرفة للقاعدة أكبر من Ld حديد العمود.
ثانياُ : يتم عمل حديد القواعد على شكل حرف U
عندما تكون الرفرفة للقاعدة أقل من Ld حديد العمود.
لكن ما هى رفرفة القواعد ؟
هى المسافة من حديد العمود لنهاية حديد القاعدة.
و ما هى ال Ld ؟
هى طو ل التماسك Development Length
و هو الطول اللازم لمنع انزلاق أسياخ الحديد داخل الخرسانة تحت تأثير اجهادات الضغط و الشد المؤثرة على هذه الأسياخ.
بمعنى أدق : هو الطول اللازم لنقل اجهادات الضغط أو الشد من الحديد للخرسانة.
و كما هو موضح بالصورة السابقة أين تكون رفرفة القاعدة المقصودة.
بمعنى اذا كانت طول رفرفة القاعدة أكبر من 60 قطر سيخ السليح فيتم ثني الحديد على شكل حرف L و ذلك تبادلياً بمعنى سيخ أيوه و سيخ لأ.
أما اذا كان طول رفرفة القاعدة أقل من 60 قطر سيخ التسليح فيتم ثني الحديد على شكل حرف U.
و هذا موضح بالصورة و الرسومات بالأسفل.
للتبسيط :
تعالى معايا أبسطهالك
شوف يا بشمهندس شايف الصورة المكتوب عليها الرفرفة باللون الأحمر هى ده بقى رفرفة القاعدة المسلحة و خلى بقولك القاعدة المسلحة و ليست العادية انتى فاهمنى.. صح ؟
طيب... شايف العمود اللى فى القاعدة المسلحة دى..
أيوة شايفة..
ده هو العمود اللى فيه حديد تسليح.. طيب ايه المشكلة هنا؟
ربنا ما يجيب مشاكل.. كمل معايا بس.
العمود ده اللى فى القاعدة المسلحة فيه أسياخ و الأسياخ ذات أقطار معينة... تمام 👌؟
تمام.
الأسياخ دى بتاعت العمود بقطر معين.. انت بقى تاخد القطر ده و تضربه فى 60 مره... تمام ؟
تمام.
و بعدها تشوف هل الرفرفة بتاعت القاعدة المسلحة اللى باللون الأحمر دى أقل من الرقم بتاع 60 مرة قطر العمود و لا أكبر؟
لا طلعت الرفرفة أكبر يبقى يا بشمهندس تعملها حرف L و يكون تبادلى يعنى سيخ أيوة و سيخ لأ
و هتلاقى الصورة اللى تحت موضحة الكلام ده و بالقطاعات الأفقية كمان.
أما لو طلعت الرفرفة بتاع القاعدة المسلحة اللى باللون الاحمر طلعت أصغر من الرقم بتاع 60 مرة قطر سيخ العمود.
يبقى مش عايزة كلام دى تتعمل على شكل حرف U.
كده تمام؟
ياريت أكون وصلت المعلومة ببساطة.. ♥️
