مقدمة :
الملاحظات فى استلام سيراميك الحوائط :
طبعا اهم شئ قبل اى حاجه انك قبل ماتطلب السيراميك تعمل حصر طبقا للرسمه الى هنهعملها وتوفقها على الارتفاع والعرض على الطبيعة يعنى كام صف غامق وفاتح وهندسى والستلو وعدد وأماكن بلاطات الديكور .
استلام السيراميك نفسه :
١- تفتيح الكراتين والتأكد من درجه الفرز من الكرتونه ونقض البلاطات المختلفه فى التون (tone) والى بيكون وارد الحدوث لو سيراميك مش فرز اول.
٢- نقض البلاطات المشطفة أو المشروخه أو المكسوره نتيجة التشوين علشان نشغلها فى الغلايق أما لو قبل التشوين هنستلم يبقى المكسور والشطف يرجع للمورد.
٣- نقع البلاطات فى برميل مياة عشان تشرب الطفلة الى فى ضهر البلاطه و ماتشربش مياة من مونة التركيب بعدها.
٤- التاكد من أن السيراميك الموجود كافى للمساحة الى هنشتغل عليها طبقا لرسمة ال shop drawing .
٥- لو مافيش لوحة لرسم السيراميك يبقى هنشتغل طبقا للتوزيع الى احنا حسبنا السيراميك على اساسه كام صف غامق وكام صف هندسى وكام صف فاتح ومكان الستلو وهكذا وبنجربهم على الطبيعه ونتاكد منهم .
استلام التركيب :
١- استلام الخيوط الرأسية ( السواعى ) قبل البدأ فى التركيب.
٢-منسوب اول بلاطه تركيب من تحت انها هتحقق الرسمه وانها بدايتها من تحت اوطى من الشيرب على الاقل ٣ سم علشان يقفل عليها سيراميك الارضية وانها هتصحح بلاطه سليمه فوق ومايبقاش غلايق فوق وتحت .
٣- رأسية الجنب نفسه بميزان المياه بشكل مستمر اثناء التركيب
٤- استلام التقاء الزوايا اما بالشطف او بتركيب زاويه خارجيه ( حِليه ) واستلام رأسية التقابل .
٥-استلام الزاوية أفقياً بين كل جنبين متقابلين وكذلك توازى كل جنبين متوازين ( استرباع بالمتر ) .
٦- استلام تعريض الأعمدة بعد التركيب .
٧- استلام زاوية الأعمدة مع الجنب .
٨-استلام زاوية بطنية الكمر السفلية مع الجنب .
٩- استلام آخر بلاطتين بميزان المياة لانه بيركبهم بعد مايكون شال الخوابير الى كان رابط فيها السواعى .
١٠-استلام التطبيل وده عن طريق الدق على البلاطة وسماع الصوت يجب أن يكون مكتوم اما لو مفتوح يبقى البلاطة ضهرها فاضى وهتطبل .
١١- استلام استمرارية والتقاء الفواصل انها تبقى متساوية ومستمرة ( يفضل استخدام صلايب لظبط العراميس ).
١٢- استلام التسنين بين البلاطات ان مايكونش فى بلاطه بارزه عن غيرها وده بنى بعدى عصاية خشب على البلاطات وهيبان اذا كان فى جزء بارز او لا .
استلام بعد التركيب :
١-استلام تفتيح العاميس بفرشاه سلك فى نفس يوم التركيب.
٢- استلام السقية فى تانى يوم بعد التركيب والاهم فى اليوم التالى للسقية كمان علشان لو حصل انكماش فى السقية يتعاد عليها .
٣- لو هتعمل سقية ملونة اشتريها جاهزة ماتخلطش الوان على الاسمنت الابيض علشان لونها هيغير تانى يوم وكمان لو حبيت تعيد على جزء منها ممكن يطلع مختلف فى اللون .
طبعا لو التركيب بماد لاصقة مش بلدى مش بيبقى فى خيطان بيبقى الاعتماد الكلى على طبقة البياض نفسها انها تكون معمولة على بؤج و أوتار رأسية واستلام استرباع وزاويه طبقة البياض نفسها .
التركيب بمادة لاصقة بيكون اجبارى لو حجم البلاطة كبير
٦٠ × ٦٠ مثلا أو ٣٠× ٩٠
او لون البلاطة نفسها قابل انه يتغير لو شرب من المونه وبيبقى مكتوب على الكرتونه انه لازم يركب بمادة لاصقة
لو عندى علاقه أقل من ١٠سم اضيف ال ١٠ سم على عرض البلاطه وأقسم على ٢.
مثال عرض بلاطه ٣٠ والغلاقه ٨ سم هيقى ٣٨ على ٢ = ١٩ يمين ويسار ملاحظه لا يتم تركيب الغلاقه فى مدخل الباب